أخي المغترب … عندي صرخة وجع ، اسمعها من فضلك

طالبوا مع أبعاد بـ #المؤبد_إلو_الحياة_إلها

إنت ونازل تنتخب اليوم بالسفارات تذكر وفكر :

– مين السبب بتهجيرك وليه انت بعيد عن وطنك واهلك وعيلتك.

– اديش عم تبعت من معاشك قسط المدرسة واذا مرض شي ولد يتاخد سلفة عن شهرين وبتبقى عم تشتغل وتسد.

– تذكر كم راح ضحية بالإغتراب ، كله بسبب المحسوبيات بالوطن وعدم توفر فرص عمل ، الشاب اللي حمل روحه على كفه وتغرب ليطعمي عيلته ويأمن مستقبله.

انت صرلك ٥ سنين مغرب وبعدك مش نازل على لبنان ، وغيره ١٠ سنين وغيره ٢٠ و ٤٠ و ٥٠ سنة.. كله بسبب شو ومين!

قارطينّا بالوطن وحتى بالإغتراب ، انا بعمر الشباب يللي هو اجمل عمر ما عم عيش فيه شبابي بين اهلي ووطني ومضطر اتغرب واكبر بعيد عن اهلي ويكبرو اهلي ويمضى العمر بسرعة..

بس كرمال ما الي مكان بلبنان لأني ما بنتمي لهيدا الحزب وهيداك التيار وما بعرف اسكت عن حرمان وتجويع الناس وادعس على اوجاعهم حتى آكل واصرخ لبيك يا زعيم..

يا منكون كلنا متساويين ومنتشارك الفقر يا بلا ما نهلل ونساهم بتجويع اهلنا واخواتنا.

بدك تقلي مقاومة ! بدي قلك على راسي وفدا اجر تضحيات المقاومة بس المقاومة موجودة وباقية ومتعددة وكلنا مقاومين.

بدك تقلي لولا الحزب الفلاني ما كنا عايشين،، يا تقبرني ليش نحنا عايشين اصلاً! عايشين من قلة الموت وبدون كرامة بوطننا.

كله بهلل لكله ، هيدا ايراني وهيداك سعودي..

ونحنا #شيعة_السفارة اذا فتحتا تمنا على اساس في فرق بين سفارة وسفارة بس يمكن محلل عليهم ومحرم علينا ، مع انو ولائنا للوطن وللمواطن هو فخر على راس اكبر واحد.

اذا بدي كمل وعبر عن اوجاعي ما بخلص كتابة لبعد اسبوع، ما رح طول بس اخي المواطن انتخب صح بكفي هالقد صار لازم نغيّر كرمال ولادنا مش كرمالنا نحنا ضيعنا أيامنا كرمال طوائفنا واذا بدك كرمال نموت بوطننا مش بالغربة ، واذا ما في لائحة مقنعة بدائرتك قاطع متل ما انا مقاطع.

وبعتذر اذا كلامي موجع، بس واقسم بالله انو كلامي نقطة ببحر الوجع اللي سببولنا هو.

الناشط علي حويلي
غينيا – كونكري

المقالات والآراء المنشورة في الموقع والتعليقات على صفحات التواصل الاجتماعي بأسماء أصحـابها أو بأسماء مستعـارة لا تمثل بالضرورة الرأي الرسمي للموقع، بل تمثل وجهة نظر كاتبها، والموقع غير مسؤول ولا يتحمل تبعات ما يكتب فيه من مواضيع أو تعليقات ويتحمل الكاتب كافة المسؤوليات التي تنتج عن ذلك.
Loading...